كل يوم قبل ما انام اقعد افكر فى الكلام اللى جاى ده! و أقول "أنا هستنى لبكره الصبح و أول ما أصحى هكتبه"...لحد ما انهارده قلت لا ما هو هيتكتب يعنى هيتكتب!!!..
.أنا بفكر حلو أوى و أول ما أجى أكتب بتبقى هنا المشكلة أبقى خايفة الكلام مايبقاش طالع زى الفكرة!
مش مهم السطر اللى فات ده كان زى تنبيه كده انى ممكن اكون مش بعرف أكتب حلو بس برده هكتبببب!!
من أكتر من اسبوع كده كنت بتكلم مع واحدة صاحبتى (أمينة عيداروس) فقالت لى "أنت عايشة حياتك دلوقتى لأحلامك اللى فى المستقبل" أنا لحد دلوقتى بفكر فى كلامها...حلو اننا نحلم حلو أوى كمان ! حلو اننا نفكر لقدام و نشوف حياتنا و نشوف كل المراحل...بس فكرت برده فى اللى أغلبنا بيعملوا...اننا عملين "أيقاف"(جيت أكتب ستوب معرفتش!!!)...مخليين الظروف قيود الحاضرو عايشين فى أحلام المستقبل...
لكل واحد فينا
اللى مستنى يخلص كليته عشان يبتدى يشتغل بقى فى حياته اللى هو عايزها و يبقى ليه لزمة (أصله حاسس انه ملوش لزمه)
واللى مستنية تخلص اللى وراها دلوقتى عشان تبتدى مذاكرة بقى
واللى مستنى يخلص جيش عشان يعرف يكمل حياته
واللى مستنية اللى حواليها يتغيروا معاها عشان تبتدى تصلح من نفسها
واللى مستنى يتجوز عشان يبقى عنده أسرة بقى (مع انه دلوقتى عنده أسرة أصلا بس معظم الوقت مش موجود معاهم)
واللى مستنى الاجازة تيجى عشان يبتدى يهتم بصحته بقى و يلعب رياضة ( أصل ما فيش وقت دلوقتى)
و اللى مستنية الصيف عشان تبتدى دروس و كورسات (مع ان كل صيف بيعدى كده!!)
واللى مستنى رمضان عشان يرجع يقرب تانى (كأننا رمضانيين مش مسلمين)
بس كل واحد فى دول للأسف هيفضل مستنى...
لأن كل واحد مستنى حاجة تحصل عشان يبقى حد تانى...هيفضل طول عمره كده...
لأنه مستنى من زمااااااان حاجات كتير و كل شوية بيلاقى حاجة يستنى عشانها...
عرفتوا أنا ليه المرة دى قررت أكتب قبل ما أنام ؟؟؟ : )
لو ضامن انك هتفضل موجود افضل مستنى....لو مش ضامن
أبتدى حياتك دلوقتى و خليك فاكر... "إن الله لايغير مابقوم حتى يغيروا مابأنفسهم"
ليست هناك تعليقات:
إرسال تعليق