الإستقرار هو ده لازم يعني ؟ حاجة مهمة ؟
أيوه طبعا ..أنا لا أشكك في إني إنسانة وبالتالي لا أشكك في احتياجي للإستقرار فهكذا تربينا وتعلمنا في مدارسنا إن الإنسان منذ بداية الخليقة دائم البحث عن الإستقرار ! فكان يتنقل من مكان إلى اخر ويسافر مسافات كبيرة بحثا عنه
فكيف لا يطالب به الآن؟ حتى بعد مرور ألاف السنين مازال الإنسان يبحث عنه!
بعيدا عن التاريخ أنتقل إلى اللغة العربية (ليصبح ماأكتبه الآن أشبه باليوم الدراسي الذي نفتقده في ظل "عدم" الإستقرار)!
كلمة إستقرار في اللغة العربية تعني “ثبات" أو “إقامة" أو “استتباب"
ومش محتاجة أعرف كل كلمة في دول لإن دي خدناها قبل كده ) عملاً بمبدأ إن المناهج تراكمية وإن الامتحان في مستوى الطالب المتوسط بس انتوا اللي ولادكم مش بيذاكروا !!(
اللي أعرفه عن الثبات إنه فيه اطمئنان ،هو من كام شهر كنا مطمنين ؟ أهلي وأهلكم كانوا مطمنين علينا ؟ يعني مكنش فيه حوادث اختطاف و سرقة وتحرش؟ و إعتصامات من النقابات والعمال كل يوم ؟ و المواطنين بيتخنقوا على رغيف العيش والامبوبة؟
اللي أعرفه إن اقامة يعني هي من السكن أو الإقامة في شيء ملكك أو ايجار حتى !
كان فيه شقق؟ آسفة قصدي كان فيه شقق غير بتوع مدينتي ؟ وكأن الشعب المصري يملك رفاهية الدش بمية سخنة فنعمله تلفريك في بورتو سخنة !ماكنتوش بتسمعوا عن الهجرة غير الشرعية ؟ عن الشباب اللي بيروحوا ومايرجعوش غير عالدفن! أو مايرجعوش أصلا بقى!
المعنى التاني لإقامة هي إقامة شيء بمعنى بناؤه..أيوه فعلا من كام شهر كنا بنبني! اقتصاديا بقى والمستثمرين كويسين و سياسياً المصري كانت كرامته بره فوق كل شيء! والحمدلله كنا محافظين على علاقة وطيدة مع أغلب الدول الحديث منها والقديم! ( معلش دي قلشة شوية بس أصلي مش عارفة يعني إيه يبقى فيه دولة عمرها 60 سنة !..مش موضوعنا دلوقتي (
ابتديت أعرف معنى البناء ده من شهر بس! لما كان كل مصري عايش هنا بيفكر ممكن يعمل إيه ! وبينزل ينفذه !
ابتديت أفهم معنى السكن في شيء لما حاسيت إن البلد دي بقيت بتعتي مش مصر هي أمي بس ! لأ مصر هي بنتي!!! مسئولة مني!
أما عن رأيي في كلمة إستقرار فهو أن أطمئن على حاضري و مستقبلي … فإذا كان البعض يشعر بالإستقرار سابقا للأسف ده كان إستقرار اللحظة مش الحاضر مع مستقبل مش باين له ملامح!
يا من تطالب بعودة الإستقرار طالب بوجوده أولا قبل ان تطالب بعودته لانه لم يكن موجوداً أصلاً!!!
أيوه عايزة إستقرار بس عايزاه حق مش تفضل
قالوا لنا زمان " من طلب العلا سهر الليالي" طب من طلب حرية و إستقرار ..يعمل إيه بقى ؟؟
جاوب الإجابة اللي تريحك بس أكيد الإجابة مش إننا نقعد في بيتنا !
فيه نظرية سياسية معروفة هي الضغط على المحكوم بحجة الإستقرار..دي اللي استخدمها مبارك في خطابه أما قال إما أنا أو الفوضى(عكس الإستقرار) بما يوحي إن هو الإستقرار بعينه.
ردحذفملحوظة بسيطة معرفش ماحدش بياخد باله منها ليه, استقرار = أمان..أمان = حياة عادية..عادية X طوارئ
..طوارئ = قانون الطوارئ..يعني احنا من سنة 1981 عمرنا ماعرفنا الإستقرار
في كل الاحوال..شفيق لازم يمشي
إستجاب أهو يا عثمان :)
ردحذف