عن السواقة والدي في دي ونص رغيف الفول..

أنا فعلا عندي مشكلة في البدايات والمقدمات!! فـبعد ما قلت المعلومة دي بقى عندي عذر فـأدخل في الموضوع وانا مستريحة!

أي حد ييعرفني هيبقى عارف إني مش بسوق عربيات!

أي حد يعرفني أكتر شوية هيبقى عارف إن رياضيات كلية الهندسة مش عقدتي الوحيدة وإن السواقة هي أقوى منافس ليها!!!!

بس أنا بجد حاولت كتييير قوي! في السواقة مش في الرياضيات ) أيوه يا ماما بس هانجح إن شاء الله !!!)

المهم محاولاتي دي تتلخص في إني رحت مدارس سواقة وطلعت رخصة الحمد للة وابتديت أحاول اتعرف أكتر على العربيات وأفهم أنواعهم وأسأل كتير وكان ملخص تجربتي كالآتي

1. سؤال سألته مرة : " هي عربيتك "أوتوماتيك" ولا "بوار" ؟؟؟ ونترك الإجابة للقارئ

2. تطوعت احدى صديقتي من الناس اللي بيعرفوا يسوقوا كويس يعني-عشان محدش يقول البنات بتسوق وحش -إنها تعلمني السواقة

أول مامسكت الدركسيون وبعد زي ما قلت دروس السواقة " هو فين البنزين وفين الفرامل؟؟؟"

مش مهم البنت صبورة يعني! بعد مجوبتني فضلت أدوس بنزين والعربية مش راضية تطلع!!! إحساس بالنحس بقى!!

"ندى .. هي العربية مش بتطلع ليه؟؟"

اجابة ندى بكل هدوء "عشان إنتي مش مدورة يا مي"!

3. أقرر إني خلاص لازم اعتمدعلى نفسي - بعد عدة محاولات شبه ناجحة -ماشية بالعربية وشايفة نفسي داخلة في عربية تانية … صوت ندى من جنبي "فرملي يا مي" أنا سمعاها كويس قوي بس مش بأخد أي قرار!!! ليييه؟ عشان نسيت أنهي الفرامل وأنهي البنزين!!!

طبعا ل خبيري السواقة الموضوع بسييط جدا بس لأ!!!!

دول مش دواسة واحدة! ولا اتنين! دول تلاتة!!!! ومش مراية واحدة ولا اتنين دول تلاتة!!!! الموضوع فعلا موتر للاعصاب!

كام أتمنى ان بعد نشر الكلام ده أي شركة عربيات حتى صيني تتعاطف معايا ويعملوا خط إنتاج عربية بدواسة واحدة! أدوس تمشي أشيل رجلي العربية تقف!!!... أمنية !

بس اللي يعرفني أكتر من كل ده يعرف إني أكيد مش كاتبة عشان أتكلم عن انجازاتي في عالم السيارات!!

أنا بس اللي فكرني بالموضوع ده هو التاكسي! أصْلي لو اتعلمت السواقة ممكن مركبش تاكسي تاني! وده معناه إن 90% من الحاجات الغريبة اللي بشوفها في حياتي ممكن ماشفهاش تاني!!

أخرها كان النهارده... تاكسي اسود مش أبيض عشان مكنش معايا فلوس!

تاكسي هيونداي كمان ! تبدو حاجة عادية يعني!

التاكسي كان فيه “دي في دي" أمام المقعد المجاور للسواق!!!! ماشي هنعديها!

وكان مشغل فيلم لمحمد هنيدي .. بتحصل!!!!!

اللي أنا كان نفسي أقوله " يابختك بتعرف تسوق وكمان وإنت بتتفرج على “ دي في دي"؟؟؟

اللي كان شاغل تفكيري برده " هل عامو الراجل ده هيوافق ياخد 5 جنيه بس؟؟ ده الدي في دي دلوقتي مش أقل من 30 جنيه والراجل حقه يغير يعني وراه مصاريف!!!"

المشكلة إني سبت الراجل وخد ال5 جنيه الحمد لله

و أول ما طلعت بيتنا بسلام أفتح برنامج عمرو الليثي "واحد من الناس" عشان ألاقي راجل عنده 60 سنة بيعيط عشان نص رغيف الفول بقى جنيه ونص ورب أسرة عنده 5 ولاد ومرتبه 250 جنيه وبيقول “زمان كنا بنقول اللي جاي قد اللي رايح دلوقتي اللي جاي مش مكفي اللي رايح ”!!

وساعتها أفتكر إن أنا وسواء التاكسي اللي كان شغلنا الدي في دي والخمسة جنيه!

فافتكر" كم في مصر من مضحكات ولكنه ضحك كالبكاء"

وأقفل التلفزيون وانا مش عارفة المفروض أعمل إيه؟!

***** خايفة أكون اللي كاتباه ده عامل زي الفنان المذكور أعلاه “ محمد هنيدي" مفيش غيره! لما يعمل مسرحية أي كلام في أي حاجة ! وفي الآخر يقولك أصل دي اسقاط عالقضية الفلسطينية أو على حال العرب!

فإذا كان وصلك الإحساس ده فـأنا كان كل قصدي إني أطَلع شوية أفكار جواية يمكن حد يبقى عنده حاجة تتعمل لو فيه حاجة تتعمل.. ويمكن ده قصد محمد هنيدي برده!