كشك حراسة... علي سلامة

أنا لما بافرح
بحكى للدنيا كلها
حتى لطوب الأرض
واحزن.. أخبى
وأسكت كأنى
عمرى ما عرفت الكلام..
علمتنى الغربة
أعد العمر بالثانية
وامسك بروحى فى الأيام..
مابخفش م الضلمة
لكن بحب أنام ف حضن وناسة..
ما عنديش بطاقة انتخابية
وعمرى ما اتمنيت أكون وزير
ولا اتصورت إنى أشوف تحت بيتى
كشك حراسة..
وجوايا طفل
بيعشق الحرية
وبيكره العصايا
حتى لو كانت مصاصة..
وخدى بالك..
لو فكرتى تقتلينى
يمكن تحتاجى أكتر من رصاصة..
لإنى حتى وأنا بنزف
بيبقى فيه دايماً أمل
إنى أعيش..
وإن غبت..
ماتسأليش..
أنا لا يرجعنى حكم محكمة
ولا عسكرى
لكن يرجعنى الحنين للغنا
وعشق الحياة فى دمى
زى أحزانى..
وراثة..