الكلام اللي جاي ده مش مهم .. هو مجرد تفريغ طاقة لواحدة متغاظة !!.. جدا !!!
لما يعدي يوم .. لأ أيام في حياتنا بنشتغل 3 ساعات و نقعد 6 ساعات في الطريق و المواصلات ..
6 ساعات في الشارع … ماعرفتش أعمل فيهم أي حاجة غير إني اتفرج على الشارع و الناس و المحلات اللي فوق الرصيف و المحلات اللي في الشارع تحت الرصيف ! و التوكتوك و المواصلات العامة و الخرفان ودعاية مرشحي مجلس الشعب و البيوت و أصحاب البيوت ..
لفت نظري عند نقابة المحامين … الإعلانات اللي فوق بعض و جنب بعض لنفس المرشح و كأنه خايف يفوته نص متر مافيهوش إسمه … لفت نظري المرشح اللطيف قوي اللي مش حاطط غير صورته و كاتب
"بدون شعارات … فلان الفلاني “ كنت عايزة أقوله مش قوي كده حضرتك !
--------------------------------
مرورا ببلاق أبوالعلا.. مرشح لمجلس الشعب إسمه أيمن حاجة .. عامل مول بحاله لتسكين الباعة الجائلين .. شكرا
بس غالبا نظرتي السلبية للأشياء في الوقت ده .. خلتني أستفز من
1. مسمي المول بإسمه !! مول أيمن طه لشباب بولاق .. هو ده نكران الذات مش المول بتاعه يكتب إسم من يعني!
2. بما إنه مول بولاق أبوالعلا .. أستاذ أيمن و أصدقائه إستخدموا الفوتوشوب و على اليافطة حاطين صور رجالة من جنوب شرق اسيا غالبا !!! اللي هم لا يصلحوا لأن يكونوا شباب من أي حتة جنبنا أصلا !
3. مع إستخدام الفوتوشوب .. أضاف أستاذ أيمن و أصدقائه بعض الماركات العالمية على المول اللي هو أصلا تاني لتسكين الباعة الجائلين .. مثل : zara , Bershka
4. المنطقة دي فعلا مليانة باعة جائلين و عددهم زاد اليومين دول .. ففكرة المول دي يا رب تبقى فعلا للمصلحة العامة
5. أستاذ أيمن كمرشح لفت نظري طول الطريق )و ده يدل على إن الشارع ده بالذات كان مش بيتحرك اصلا !(
6. أستاذ أيمن لم يكتفي بالمول .. باليافطة كبيرة عليها صورته – دي عادي – و تهنئة لأهالي بولاق بالعيد –دي كمان عدي برده أنا عارفة و الله – و تهنئة لشباب 25 يناير - ماشي يا أستاذ أيمن – و تهنئة لأهالي شهداء 25 يناير… كليشيه قوي !
الله أعلم بأستاذ أيمن ناوي يعمل إيه .. بس نفسي لو مانجحش في الإنتخابات مايقفلش المول !
--------------------------------------
حاسيت إن المصريين بقوا شبه المجتمع الأمريكي قوي .. شكلا بس !مش قصدي التغريب .. قصدي الإختلاف والتنوع
إحنا إزاي شكلنا مختلف قوي و في نفس الوقت كلنا شبه بعض !
لحظة إنفصام دي !!!
بس إحنا فينا طبقات إجتماعية مختلفة .. أهل كل منطقة ليهم شكلهم .. مساكن شيراتون غير شبرا غير الدقي غير الزمالك غير بولاق ! و في كل منطقة الأهالي شكلهم مختلف تماما .. مظهر بس ..
يجمعهم كلهم نفس التعبير اللي عالوش عالساعة 4 العصر الناس شكلها مرهق و كله متعصب على كله .. على 7 كده بيتغير شكل الناس شوية .. بيبقى شكلهم اكثر سعادة – مش كلهم - مع نوع من أنواع اللا مبالاه أو إعتياد الزحمة دي .. اللي هو خلاص هنعمل إيه يعني !
------------------------------------
طول الطريق كان معايا آية صاحبتي كنت بعلق ليها على ملاحظاتي اللي ملهاش أي لازمة .. و أنا مروحة لوحدي حاولت أقرأ !.. ماهو أكيد مش هكمل ال6 ساعات بتفرج على صور مرشحين !
طلعت الكتاب .. حاولت و الله !
بس الصخب اللي في الشارع فضل موجود حتى بعد ماقفلت الشباك .. الدنيا صوتها علي قوي و التاكسي بيترجرج في الطريق لدرجة إني مش شايفة الكلام خلاص ..
------------------------------------
دخلت الكتاب في الشنطة و قلت أقول شوية أذكار و أستغفر و أدعي ربنا يرضى عنا و يدلنا إزاي نصلح البلد دي!!!
المرشحين طلعوولي برده !!
الشيخ جمال!
الشيخ جمال واخد شارع شبرا كله يفط برده .. و تنوعت اليفط و صورته هي هي على كل اليفط صورة رجل شيخ بلحية و رافع صباعه للشاهدة كده ..
فضيلة الشيخ حازم أبو إسماعيل المرشح للرئاسة يساند أخوه فضيلة الشيخ جمال لمجلس الشعب .. ماشي :D
تاني يافطة .. الشيخ جمال - مدير قناه معرفش إيه .. فعلا مش فاكرة إسم القناه معرفهاش يعني -مرشحكم لمجلس الشعب سنحيا أحرار
غالبا الشيخ جمال لم يذكر 25 يناير عشان ماكنش فيه إجماع على إنه يوم حلال ساعتها …
-----------------------------------
أنا كنت فاكرة إن بعد الثورة فيه حاجات كتير هتاخد وقت على ماتتغير .. طبيعي .. 30 سنة فساد مش هيتغيروا في كام شهر ده اللي بقالي كتير باقوله لأخويا..
في وسط البلد عندالوكالة على الكورنيش كده .. السايس بيركن العربيات صف تاني على إنه باركينج .. و لما العربيات تاخد مخالفة يمشي يلم المخالفات و يحاول يشيل أثارها من على إزاز العربية !
------------------------------------
الخرفان دلوقتي واخدة حارة من معظم الشوارع .. كنت بفكر مع آية لو خروف في دول اتهور مثلا و طلع يجري قدام العربيات .. آية ربنا يخليها سمعت نظريات من دي كتير طول الطريق … و شكرا إنها استحملتني لما أخاف أو عربية تقرب مننا كنت ازق ايدها و ادوس على الكلكس
--------------------------------
للحظة و إحنا في وسط الطريق لما ببص على المباني و اللفات و الشوارع الجانبية ..
افتكرت جورج عزمي لما أكد إن اللي بنى مصر كان في الأصل حلواني !!! أكييد الراجل ده عمره ما درس معمار !!
الشوارع شبه اللعبة اللي كنا بنلعبها و احنا صغيرين دي .. خطوط كتيييييييير و طرق كتيييييير و إحنا نحاول نوصل من نقطة لنقطة تانية في اخر الصفحة !
------------------------------------
أنا إشتغلت 3 ساعات و كنت متضررة جدا جدا من الطرق دي .. أُمّال الناس اللي بنتزل كل يوم بتعمل إيه ؟
الناس اللي عندها بيت و أسرة و لازم يشتغلوا و ياخدوا بالهم من البيت ده في نفس الوقت ؟!
للحظة حاسيت إن الشعب المصري ده كله أبطال - ده تأثير كليشيهات أستاذ أيمن -!! بس إنه قادر يتعايش ! إنه قادر كل يوم ينزل من بيته و هو بيشوف كل ده في سكته!
صاحبتي الألمانية لما كانت هنا مرة .. بتتفرج على صوري و أنا طفلة .. لابسة حلق في ودني –عادي جدا – هي ماكنش بالنسبة ليها الموضوع عادي كده .. دي تحولت إلى قضية حقوق إنسان ! استغربت إزاي أهلي يمنعوني من الإختيار ده ؟ و إزاي أهلي يجبروني إني ألبس حلق في السن ده!!
كنت باحكي لأهلي و أنا مذهولة مش مصدقة انفعالها … ساعتها أبويا شرحلي إن مستوى رفاهية الفكر بتفرق كل ما ضغوط الحياة تقل ..
النهاردة بس فهمت الكلام اللي فوق ده .. فهمت انهم فضلوا 30 سنة بيزودوا الضغوط عشان منفكرش في أي حاجة تانية .. خالص ..
عشان لما يبقى فيها ناس بتصرخ عشان الكرامة الإنسانية .. يبقى فيه ناس تانية قدامهم بيسكتوهم عشان خايفين مايلقوش لقمة العيش بكرة ..
عشان لما يبقى فيه ناس بتموت في السجون و لما تشوف أي حد ليه أقل سلطة في البلد ركبك تخبط في بعد قدامه نسكت عشان الإستقرار..
عشان في يوم من الأيام يبقى تهديدنا
" أنا أو الفوضى “
و لسة عايشين بنتنفس و بنشتغل و بنتخانق و بنتجوز وبنتعلم و بنكتئب و بنتفائل و بنثور .. لسة ماسبناش البلد …
أنا وصلت بيتنا .. أخيرا الحمد لله !
